Qo-ka mi pa decide grafo in Glosa?

 Nuli-pe dice Glosa. Mi ski id. Klu si id es u simpli e facili lingua de disci, multi pe ne ski de id existe. Mi pensi ke u-ci es uno-ra tristi, ka multi pe lose multi tem disci plu artificia lingua qi, veri, ne es iso facili de mu gene promoti. Plu hetero pe disci mu ka u komunita es ma mega, e u-ci es u boni kausa, sed, te mi, u-ci ne es u cefa qalita ke u ge-face auxi-lingua debi habe. Te mi, un artificia lingua kon u buta de es un internatio auxi-lingua, debi es simpli e facili de disci. Nuli-ra ma. Mi no kura de u suposi neutra per krea un a priori lingua alo u lingua ko multi verba ex multi hetero lingua, ex panto munda.

 Mi ski ke Glosa ne es u perfekti lingua sed, qe ali artificia lingua es id? No. mi pa cerka tali lingua, e mi ne pa trova id. Ka-co, mi pa elekti Glosa, e mi resta kon id. Ka mi pote uti id pene minus stude e, u-ci, direkti komunika, debi es u maxi gravi buta de un internatio auxi-lingua.

 Posi no multi pe fu disci Glosa, posi no multi pe fu lekto mi texti. U-ci ne es gravi. Mi solo fru u-ci mikri lingua per uti id. Si vi habe interese, qo-ka ne disci id, ludi kon id e vide si id es uno-ra qo tu, karo lekto-pe, pote fru komo mi akti?